PANAWAGAN ALANG SA MGA KAPITULO SA LIBRO:
Gipatnugotan nila Peter Paul Elicor, PhD ug Regletto Aldrich Imbong, PhD
Giawhag ang mga pilosopo, magtutudlo, tigdukiduki, manunulat, ug mga estudyante sa pagpasa og mga kapitulo alang sa unang edited volume nga nagtumong sa pagpalambo sa pilosopikanhong diskurso pinaagi sa Cebuano.
Ang pilosopiya
kasagarang gipadayag pinaagi sa mga dominanteng pinulongan sama sa Ingles ug
Filipino. Bisan pa sa kabuhong sa atong mga lumad nga pinulongan, nagpabilin
nga kulang ang akademikong diskurso sa pilosopiya nga gisulat mismo sa Cebuano
ug uban pang Binisayang pinulongan.
Kining maong libro
nagtuo nga ang pinulongan dili lamang kasangkapan sa pagpahayag sa hunahuna,
kondili usa usab ka pamaagi sa paglalang og bag-ong kahibalo ug bag-ong mga
paagi sa pagpamalandong ug pagtunhay. Ang paggamit niini makaduso og pipila ka
mga kalambuan sa pilosopiya, sa pinulungang Bisaya, ug sa pamaagi sa pagpamalandong
ug pagtunhay.
Sa usa ka bahin, pinaagi
sa paggamit sa Cebuano, mapalambo mismo ang pilosopiya ug ang nahisgutang
pinulungan. Sa paggamit sa Cebuano, posibleng motunhay ang usa ka lumad nga
pilosopiya nga dili lamang naghulagway sa kasamtangang mga kategoriya sa
panghunahuna, kondili makahimo usab sa pagsusi, pag-usab, ug pagsaway niini,
kung gikinahanglan. Tabunok ang pinulongang Cebuano sa mga konsepto ug
kahulogan nga angay pang tukion isip tinubdan sa pilosopikanhong
pagpamalandong. Pinaagi niini, mapalambo ang pilosopiya pinaagi sa paglambigit
niini sa bag-ong nataran sa pagpamalandong diha sa pinulongang Cebuano, samtang
mapalambo usab ang Cebuano pinaagi sa pagpataas sa ang-ang sa
intelektwalisasyon niini – pagsanong ug pagkuyog sa dugay nang nasugdang
intelektwalisasyon sa pinulongang Filipino.[1]
Sa pikas bahin, ang paggamit sa Cebuano makatabang sa pagpalapad sa apresasyon sa pilosopiya sa Pilipinas. Kung ang pilosopikanhong diskurso mapahayag sa pinulongan sa adlaw-adlaw nga kinabuhi, mahimong mas sayon kini masabtan ug magamit dili lamang sa mga espesyalista apan usab sa ordinaryong katawhan. Sa ingon, ang pilosopiya mahimong mas malangkubon, mas demokratiko, ug mas duol sa kasinatian sa mga yanong tawo. Ang pagpaduol sa pilosopiya sa kasinatian ug kinabuhi sa yanong tawo makapalapad sa ilahang kapunawpunawan (o horizon) ug hinaot nga makamugna usab ang bag-ong pamaagi sa pagtunhay isip indibidwal ug isip sakop sa usa ka katilingban.
Busa, kining libro
nagtinguha sa paghimo og luna diin mahimong motubo ang usa ka buhing tradisyon
sa pagpilosopiya pinaagi sa Cebuano.
Mga Mahimong Hilisgutan
- Giawhag ang mga kontribusyon nga naglakip, apan dili limitado, sa mosunod:
- Lumad nga pilosopiya ug panghunahuna sa
Kabisay-an
- Pagpilosopiya pinaagi sa Cebuano
- Pagtuki sa mga pulong ug konsepto sa
Binisaya (pananglitan: buot, ginhawa, loob/kinasingkasing, kalag, dungog, gaba,
panimalos, gugma, kahadlok, paglaum, ug uban pa)
- Etika ug moralidad sa mga Bisaya
- Politika, kagawasan, ug hustisya sa
lokal nga konteksto
- Pilosopiya sa komunidad, panaghiusa, ug
pagtinabangay
- Pagkatawo (personhood) ug identidad sa
Bisaya
- Pilosopiya sa pinulongan
- Pilosopiya sa relihiyon ug
espiritwalidad
- Pilosopiya sa kinaiyahan ug kalikupan
- Feministang pilosopiya ug gender studies
sa Binisaya
- Dekoloniyal nga pilosopiya
- Kritika sa kolonyalismo ug modernidad
- Pilosopiya sa edukasyon
- Pilosopiya sa teknolohiya ug digital nga
kinabuhi
- Pilosopiya sa arte, literatura, ug
estitika
- Pilosopiya sa kasaysayan ug panumduman
- Hermeneutics ug interpretasyon sa mga
lumad nga sugilanon, epiko, panultihon, tigmo, ug awit
- Eksistensyal nga pagpamalandong
- Fenomenolohiya sa adlaw-adlaw nga
kinabuhi
- Sosyal ug politikal nga pilosopiya
- Pagbasa pag-usab sa mga klasikal ug
kontemporaryong pilosopo pinaagi sa Binisaya
- Mga pilosopikanhong pagbasa sa mga lokal
nga panghitabo ug isyu sa Kabisay-an
Giya
sa Manuskripto
Gitas-on: 4,000-6,000
ka pulong apil na ang mga references.
Kinahanglang orihinal
ug wala pa mapatik.
Ang manuskripto ipaagi
sa peer review.
Importanteng mga Petsa
Deadline sa abstract: Agosto 28, 2026
Pagpahibalo sa
pagdawat: Setyembre 14, 2026
Deadline sa tibuok
kapitulo: Enero 15, 2027
Gilauman nga petsa sa
publikasyon: Nobyembre 2027, atol sa World Philosophy
Day
Pagpasa
sa Manuskripto
Palihug ipadala ang
inyong abstract ug/o manuskripto pinaagi sa:
Email: aletheiapublishing@gmail.com
[1]
Emerita Quito, Vitaliano Gorospe, and Florentino Timbreza. “Editorial,” Karunungan,
1, 1984: v. Bonifacio Sibayan. The Intellectualization of Filipino and other
Essays on Education and Sociolinguistics. De La Salle University Press
(1999).